Թեստավորմանը մասնակցելու համար անհրաժեշտ է հետևել թեստավորման հայտարարությունների հրապարակումներին, ընտրել հրապարակված ժամանակացույցի ամենահարմար օրն ու ժամը և առցանց դիմել։ Յուրաքանչյուր թեստավորման հայտարարությունում նշվում են նաև օրենքների այն հոդվածները, որոնցից կազմվելու են առաջադրանքները։

Թեստավորումներն անցկացվում են Քաղաքացիական ծառայության գրասենյակի վարչական շենքում (ք․ Երևան, Տերյան 89):

Վարկանիշային թեստավորմանը մասնակցելու համար անհրաժեշտ է՝

• մուտք գործել կամ գրանցվել հարթակում,
• ծանոթանալ թեստավորման հայտարարության բովանդակությանը և պահանջվող փաստաթղթերի ցանկին,
• «Իմ էջը» բաժնում լրացնել պահանջվող տեղեկատվությունը և կցել հայտարարության մեջ նշված անհրաժեշտ փաստաթղթերի սքանավորված տարբերակները,
• սեղմել հայտարարության էջի վերջում գտնվող «Դիմել» կոճակը։

Պահանջվող փաստաթղթերը

Յուրաքանչյուր հայտարարության մեջ նշվում է պահանջվող փաստաթղթերի ցանկը, որոնց սկանավորված տարբերակներն անհրաժեշտ է կցել «Իմ էջը» բաժնում՝

• դիմում,
• անձնագիր և/կամ նույնականացման քարտ (նույնականացման քարտը չներկայացնելու դեպքում անհրաժեշտ է կցել ՀԾՀ-ի կամ այն չունենալու վերաբերյալ տեղեկանք),
• կրթությունը հավաստող փաստաթուղթ, ընդ որում՝
  • միայն միջնակարգ կրթություն ստացած լինելու դեպքում՝ միջնակարգ կրթությունը հավաստող փաստաթուղթը (ատեստատ),
  • բարձրագույն կրթություն ստացած լինելու դեպքում՝ դիպլոմը կամ դիպլոմները,
  • բուհում սովորելու դեպքում՝ ուսանող լինելու վերաբերյալ տեղեկանք կամ ուսանողական տոմս,

• արական սեռի անձինք՝ նաև զինվորական գրքույկի բոլոր գրառված էջերի լուսապատճենները կամ կցագրման վկայականը,

• աշխատանքային գործունեությունը հավաստող փաստաթուղթ (առկայության դեպքում),

• 3x4 չափսի մեկ լուսանկար:

Ուշադրություն
Անհրաժեշտ է թեստավորմանը ներկայանալ անձնագրով, նույնականացման քարտով կամ անձը հաստատող այլ փաստաթղթով (զինվորական գրքույկ կամ ՀՀ ոստիկանության կողմից ժամանակավորապես տրվող անձը հաստատող փաստաթուղթ) թեստավորման նախատեսված ժամից 15 րոպե առաջ։

Տրամադրման ժամկետը և կարգը

Դիմելուց հետո 3 աշխատանքային օրվա ընթացքում անձը ծանուցվում է թեստավորմանը մասնակցելու վերաբերյալ իր դիմումի հաստատման կամ մերժման մասին։

Հավելյալ տեղեկատվություն

Օգտատերը անձնական էջի «Մրցույթներ» բաժնում կարող է տեսնել իր դիմումի կարգավիճակը, անհրաժեշտության դեպքում՝ խմբագրել այն։ Մասնավորապես՝ փաստաթղթերը թերի լինելու դեպքում անձը կարող է տեղեկացվել այդ մասին անձնական էջի «Ծանուցումներ» բաժնի և էլեկտրոնային փոստի միջոցով, ինչից հետո անհրաժեշտ կլինի շտկել փաստաթղթերում առկա թերություններն ու կրկին դիմել 2 աշխատանքային օրվա ընթացքում։ 

Թերությունները շտկելու համար անհրաժեշտ է՝ 

• սեղմել անձնական էջի «Մրցույթներ» բաժնի համապատասխան հայտարարության հերթական համարից առաջ դրված ⊕ նշանին և ծանոթանալ փաստաթղթերում առկա թերությունների մասին մեկնաբանություններին,
• «Գործողություններ» դաշտի «Խմբագրել» կոճակը սեղմելով՝ կատարել համապատասխան փոփոխությունները և ներքևում նշված «Դիմել» կոճակի միջոցով կրկին ներկայացնել դիմումը։

Հղում օրենսդրությանը

ՀՀ կառավարության՝ 2019 թվականի հունվարի 31-ի N 73-Ն որոշում

«Քաղաքացիական ծառայության մասին» ՀՀ օրենք

Իրավական ակտերը հնարավոր է գտնել arlis.am-ում։